महाराष्ट्र विधानसभेच्या इतिहासात महिला आमदारांचा नवा रेकॉर्ड पण...

मुंबई : महाराष्ट्र विधानसबा निवडणूक २०१९ च्या निकालात २८८ मतदारसंघांपैंकी २४ मतदारसंघांनी आपला कौल एका महिलेला दिलाय. यंदाच्या विधानसभेत २४ महिला दाखल झाल्यात. यंदाच्या विधानसभेत भाजपाकडून १२, काँग्रेसकडून ५, राष्ट्रवादी काँग्रेसकडून ३ तर शिवसेनेकडून केवळ २ महिला विधानसभेत दाखल झाल्यात. तर दोन महिलांनी अपक्ष म्हणून निवडणूक लढवत विधानसभेत स्वत:साठी जागा मिळवलीय. यावेळी, विधानसभा निवडणुकीसाठी वेगवेगळ्या पक्षांकडून तब्बल २३५ महिला निवडणुकीच्या मैदानात उतरल्या होत्या.

उल्लेखनीय म्हणजे, महाराष्ट्राच्या इतिहासात महिलांच्या बाबतीत हा सर्वात मोठा आकडा आहे. परंतु, विधानसभेत महिलांचं प्रतिनिधित्व करणाऱ्या २८८ पैंकी केवळ २४ महिला म्हणजेच केवळ ८.३३ टक्के ...

२०१४ सालच्या निवडणुकीनं २० महिलांना विधानसभेत संधी दिली होती तर २०११ साली केवळ ११ महिलांना विजय मिळाला होता. यंदा, महाराष्ट्रात मतदारांची एकूण संख्या ८.९७ करोड आहे. त्यात ४.३८ करोड महिलांचा समावेश आहे.

यंदाच्या निवडणुकीत भाजपानं सर्वात जास्त म्हणजेच १७ महिलांना उमेदवारी दिली होती. यातील १२ जणींनी स्वत:ला सिद्ध केलंय. तर काँग्रेसनं १४ महिलांना संधी दिली होती. त्यातील पाच जणींनी विजय मिळवलाय. राष्ट्रवादीनं आठ महिलांना संधी दिली त्यातील तीन महिला यशस्वी ठरल्यात तर शिवसेनेनंही आठ महिलांना संधी दिली होती त्यातील केवळ दोन महिलांना यशाच्या आकड्यापर्यंत पोहचता आलंय.